Day 6 澎湖＞墾丁 ＋墾丁住宿體驗： 恆農假期
早上我地滑完水，行完馬公市，下午就要同澎湖告別，向墾丁出發喇！
35分鐘嘅機程，我地話咁快就到左高雄機場，比台北過黎仲要快呀！
好彩Albey都好熟路，喺機場搭到去左營站，打算再轉墾丁快線！
正當我地要去買墾丁快線票個時，有個拼車司機出手抵過墾丁快線價錢，而且時間又快D，我地就決定去拼車喇！
好可惜，我個行李太大，其他乘客又多行李，司機放左好多次都唔夠位，我地唯有去搵其他司機啦！
最後我地搵到個同價錢嘅，但要等埋另一個客人！
等緊嘅時候，我地好充份利用時間，一邊食飯盒，一邊整理早上活動嘅相同片啦！
我地拼車直接到墾丁酒店，第1晚住喺恆農假期，接近恆春！
之後個邊酒店經理同我地講左好多恆農假期歷史、呢邊有咩玩有咩食！
最搞笑係講左成個鐘，原來我地今晚唔係住係度囉！佢話因為恆農假期主要都係接待團體客，所以我地今晚會去另一邊=.=||| 個時心諗住邊都好啦！我地要快D打文章呀！
最後佢車左我地去一個外面好西式入面好中式嘅類似民宿嘅地方！
呢度就係今晚我地住嘅地方喇！
其實呢度係我同Albey都覺得成個旅程最差嘅住宿地方！
因為呢度係細到打唔開個行李箱，Albey索性將行李箱放上去雙人床嘅另一邊，同個箱一齊訓！而我個箱就唯有半打開啦！
連門口位都唔可以完全打開行李箱呢！
不過其實望真D，呢間民宿都幾傳統幾有特色！好似我睇台劇D 老一輩嘅屋企咁！
個廳好有屋企嘅感覺！
