Day 10 逢甲夜市＞望高寮＞秋紅谷公園
台灣嘅夜生活當然唔少得行夜市啦！
黎到台中，Abley 已經話好掛住逢甲夜市D野食喇！我就第1次黎，好期待呀！
逢甲夜市係我地呢個旅程目前為止行過最大嘅夜市，食嘅、飲嘅、玩嘅、著嘅幾乎都有呢！
我地重點更係放係食啦！
大腸包小腸
Albey話上次排好長龍架！好好彩呀！今次我地係一過去就買得喇！
臭豆腐
超香嘅臭豆腐，每一次聞到都想食呀XD
我記得第1次同Albey去夜市，Albey唔食臭豆腐，之後我就話”旅行就係要試新野”，今次我終於迫到佢食喇！哈！好就好食，不過個份量太多，當宵夜都食唔晒呀！我都係鐘意恆春週日夜市個種味道多D！
呢個臭豆腐有得試食呀！不過好搞笑呀！當我話要影相個時，個店員即刻禁嘅樣，人地睇完會以為唔好食呢！
月亮蝦餅
Albey話原來月亮蝦餅成日被誤會係黎自泰國，其實呢個係用泰式辣醬嘅台灣小食呢！
不過我覺得味道就麻麻喇！
惡魔雞排
喺高雄嘅新堀江，我地食左天使雞排，現在黎到台中就要試一下惡魔雞排吧！
好多夜市都會有惡魔雞排，記得拎名片睇睇分店地址，唔好食錯假冒呀！
呢個就係疑似假嘅惡魔雞排，我地見冇咩人排，好彩冇中招！XD
天使同惡魔雞排兩個都好食，要比較的話，我覺得天使雞排好似好食D，哈哈！
同埋台灣好堅持雞排要完整不切塊，因為切塊會影響味道，香港嘅同大陸嘅都會切塊呢！
搵食嘅同時，更係要搵飲啦！
旺來冰嘅冬瓜系列係我至愛呢！
最後打包一個逢甲茶葉蛋，好入味呢！
仲有其他嘅大魷魚、鹽酥菇......下一次再食過XD
星期三嘅逢甲夜市唔會太迫，下次都揀呢D時間！
食飽飽，係時候要兜下風散下步喇！
下一站我地黎到可以俯視台中最美夜景嘅望高寮！可惜D相影得冇咁靚，不過亦都因為咁，好多事物都係要親眼睇既！
最後我地去左秋紅谷公園散步，呢個地方好浪漫呀！簡直就好似偶像劇場景咁呀！
