深宵「歎」港式涼茶
由細到大都好驚飲涼茶或者苦藥嘅我，偏偏就最鐘意食煎炸辛辣熱氣嘢！所以每次食完迫不得已，為咗清熱解毒，我都會去飲番碗涼茶，好似感覺上平衡番XD唔知仲有幾多人好似我咁會飲涼茶呢？
泰和堂涼茶店係一間令我印象好深刻嘅涼茶舖，店舖位於旺角，夜晚10點先開，通宵營業至早上6點，所以夜晚唔可以太早去，早上都唔可以太遲去，簡直係一間「深宵涼茶舖」呀！
第1次嚟到係夜晚11點左右，店舖裡面嘅人流唔多唔少剛剛好，走完一批又會再嚟一批，心諗：「有咁多人飲涼茶架咩？」坐低睇過餐牌後就知道原因喇！
原來呢度除咗賣涼茶，亦都會賣糖水既，而且選擇仲好多，即刻想放棄飲涼茶轉飲糖水XDDD 當然嚟得涼茶舖都係飲番碗正宗嘅涼茶好啲！
呢度嘅涼茶分左好多唔同嘅特效，有傷風感冒茶、退骨火袪濕茶、清熱解毒茶、喉痛茶等等。第1次我試飲咗清熱解毒茶，嗰種味道永世難忘呀！！！
清熱解毒茶飲後感：
有人話大啖啲飲冇咁苦，所以我第1啖好大啖......結果係好苦呀！！！！
我平時係鐘意食苦瓜同會飲涼茶嘅，呢碗清熱解毒茶真係「一試無防，再試投降」XDD
由頭到尾都係苦嘅味道，飲到面容都扭曲呀！
不過功效係有嘅，因為通常我食完煎炸辛辣熱氣嘢嘅第二日都會生飛滋或暗瘡，嗰晚飲完第2日係冇事既！
除咗特效茶，呢度仲有一啲清熱明目的五花茶、夏枯草、火麻仁等等的普通涼茶，從未飲過涼茶又怕苦嘅，可以從呢D由淺入深！
記得有一次馬來西亞嘅朋友嚟香港玩，我當然要盡一盡地主之誼，帶佢哋去食好嘢啦！
不過好嘢大多數離唔開「煎炸辛辣熱氣」，結果當晚我哋去咗食雞煲，仲要係叫得幾辣下，食完一定好熱氣，所以下半場就係帶佢哋去試飲一下我最難忘嘅港式涼茶喇！
佢哋喺馬來西亞都有飲過涼茶，會叫做「苦茶」，所以我估計佢哋一定知道係苦嘅，就唔洗由淺入深，直接推介佢哋飲特效茶喇！針對番佢哋有少少喉嚨痛，叫左碗喉痛茶！飲之前，我都同佢哋分享過我飲完清熱解毒茶嘅感覺，喉痛茶就冇飲過，所以祝佢哋好運喇！XDD
馬來西亞朋友嘅喉痛茶飲後感：
一聞已經感到苦味，然後飲第一啖，面容扭曲，大叫「好苦呀！！！」
佢哋話喺呢度見識到咩係真正嘅苦茶，然後迫於無奈地要將成碗嘢飲完，不過飲到最後佢哋竟然話有甘甘地嘅味道，唔通就係「苦盡甘來」！
唔想飲涼茶嘅，呢度仲有中式和西式糖水的選擇，喺附近食完晚飯，過嚟飲下糖水、食下生果都唔錯架！
泰和堂涼茶店
地址: 旺角 通菜街96號地下
電話: 2789-2345
營業時間: 10pm-6:00am (星期一至日)
注意: 只收現金
No comments:
Post a Comment